کراچی: فیڈریشن آف پرائیویٹ اسکولز کے وائس چیئرمین خالد رضا کی ٹارگٹ کلنگ

کراچی کے علاقے گلستان جوہر بلاک7 میں  نامعلوم موٹر سائیکل سوار ملزما ن  کی فائرنگ سےفیڈریشن آف پرائیویٹ اسکولز کے وائس چیئرمین اور دارارقم اسکولز (سندھ ریجن) کے ڈپٹی ریجنل ڈائریکٹر 55 سالہ خالد رضا جاں بحق ہوگئے۔

پولیس کے مطابق واقعہ بظاہر ٹارگٹ کلنگ معلوم ہوتا ہے۔مقتول کی جیب سے 70 ہزار روپے نقدی اور موبائل فون موجود تھا۔

یہ بھی پڑھیے

اسلامیہ کالج پشاور میں چوکیدار کی فائرنگ سے پروفیسر قتل

ٹک ٹاک بنانے سے کیوں منع کیا؟ لوئر دیر میں بیٹے نے باپ کو گولی مارکر قتل کردیا

خالد رضا کو گلستان جوہر بلاک 7 میں ان کے گھر کے سامنے جامع مسجد فارو ق اعظم و مدرسہ انوار القرآن  سے متصل سڑٖک پرموٹرسائیکل سوار 2 ملزمان نے عقب سے سر میں ایک  گولی ماری،انہیں شدید زخمی حالت قریب واقع میمن اسپتال منتقل کیا گیا جہاں پہنچنے سے قبل ہی ان کی موت واقع ہوگئی بعد ازاں لاش کو ضابطے کی کارروئی کیلیے جناح اسپتال  اور پھر پوسٹ مارٹم کے بعد ایدھی سرد خانے منتقل کردگیاگیا۔

مقتول اپنی اہلیہ کے ساتھ  کہیں جانے کیلیے گھر سے نکلے ہی تھے کہ موٹرسائیکل سواروں نے انہیں نشانہ بنادیا۔ایس ایچ او گلستان جوہر صفدر مشوانی کے مطابق جائے وقوعہ سے 30 بور کا ایک خول ملا ہے،واقعہ ڈکیتی  میں  مزاحمت کا شاخسانہ نہیں لگتا کیونکہ  مقتول کی جیت سے 70 ہزار روپے نقدی اور موبائل فون ملا ہے۔

گلستان جوہر پولیس کا کہنا ہے کہ مقتول کو سر پر قریب سے ایک گولی ماری گئی ہے۔جائے وقوعہ کے اطراف لگے کیمروں سے ملزمان کے فرار ہونے کی سی سی ٹی وی فوٹیج مل گئی ہے۔

مقتول دار ارقم اسکولز کراچی ریجن کے ڈپٹی ڈائریکٹر اور فیڈریشن آف پرائیویٹ اسکولز پاکستان کے وائس چیئرمین اورانفرادی طور پرسماجی رہنما بھی تھے، ان کے خاندان کی  سیاسی وابستگی جماعت اسلامی سے ہے۔

دارِارقم اسکولز سسٹم کے خالد رضا کو دہشت گردوں نے شہید کردیا۔ خالد رضا ہمارے ساتھ اسلامی جمعیت طلبہ کے سرگرم کارکن تھے، تحریک آزادی کشمیر کے زبردست وکیل، تعلیم کے شعبہ سے وابستہ تھے۔ ان کےقتل کی تحقیقات کی جائیں۔ تفصیلات سے معلوم ہورہا ہے کہ یہ محض ڈکیتی کاواقعہ نہیں ہے۔ pic.twitter.com/zLSbw42OMI

— Naeem ur Rehman (@NaeemRehmanEngr) February 26, 2023

ذرائع کے مطابق  مقتول جہاد کشمیر میں متحرک البدر مجاہدین سندھ کے کمانڈر تھے اور 1990ء کی دہائی میں تقریباً آٹھ سال تک مقبوضہ کشمیر میں ہندوستانی قابض افواج کے خلاف برسرپیکار رہے ۔

ذرائع کے مطابق جہاد کشمیر  و افغانستان سے وابستہ ذمے دار کے قتل  کا یہ  اس ماہ میں  دوسرا واقعہ ہے ۔ اس سے قبل حزب المجاہدین کے ایک سابقہ لانچنگ کمانڈر بشیر احمد پیر کو گزشتہ ہفتے اسلام آباد میں گولی مار کر شہید کر دیا گیا تھا۔

حافظ سعید کے گھر کے باھر دھماکہ اسلام آباد میں حزب المجاھدین کے کمانڈر کو ہدف بنانا کراچی میں جیش محمد و لشکر طیبہ کے سابق اراکین پہ حملوں کے بعد البدر سے منسلک رہے خالد رضا کی ٹارگٹ کلنگ کی کڑیاں آپس میں مل رہی ہیں ممکنہ طور پہ یہ حملے ہندی خفیہ ادارے را کے سہولت کاروں نے کئیے pic.twitter.com/6OEpzGvVn2

— Faizullah Khan فیض (@FaizullahSwati) February 27, 2023

دوسری جانب آل پاکستان پرائیویٹ اسکول ایسوسی ایشن کے چئیرمین سید ولی وارثی اور جنرل سیکریٹری شہریار علی نے سید خالد رضا کی قتل پر شدید الفاظ میں مذمت کی  ہے۔ خالد رضا کے قتل کے سوگ میں آج کراچی بھی  نجی اسکول میں تدریس کا عمل معطل ہے۔