آئی بی اے میں زیرتعلیم غریب بچے ہمارا مستقبل ہیں، سید خورشید شاہ

پاکستان پیپلزپارٹی کے مرکزی رہنما سید سید خورشید احمد شاہ کا آئی بی اے سکھر میں قائم پاکستان کی سب سے بڑی آرٹیفیشل انٹیلیجنس لیب کا دورہ، انتظامیہ کی کارکردگی کو سراہا،لیب میں موجود روبورٹ نے خورشید کو سندھی  گیت پر خوش آمدید کہا۔ سید خورشید شاہ کا کہنا ہے کہ آئی بی اے میں 70 فیصد اسکولز کے غریب بچے زیر تعلیم ہیں، معاشرے کو غریب طبقہ کے بچے ہی ترقی دلاسکتے ہیں۔

تفصیلات کے مطابق پاکستان پیپلزپارٹی کے مرکزی رہنما سید خورشید احمد شاہ نے آئی بی اے سکھر میں قائم پاکستان کی سب سے بڑی آرٹیفیشل انٹیلیجنس لیب کا دورہ کیا۔

یہ بھی پڑھیے

ٹرانس جینڈر کرن دانش معاشرے کے منفی رویوں سے نالاں

پانی کا گھناؤنا کاروبار ، زیر زمین پانی نکالنے کے تمام اجازت نامے منسوخ

اس موقع پر خورشید شاہ کا کہنا تھا کہ خوشی ہے کہ آئی بی اے سکھر کا شمار دنیا کی بہترین یونیورسٹیوں میں ہوتا ہے، آئی بی اے میں 70 فیصد پہلے اسکولز کے غریب بچے زیر تعلیم ہیں، سی سی ایس امتحان میں پہلی پوزیشن حاصل کرنے والی  پاکستان کی پہلی ہندو بچی کا تعلق بھی آئی بی اے سے ہے۔

ان کا کہنا تھا کہ معاشرے کو غریب طبقہ کے بچے ترقی دلاسکتے ہیں، ہمارا مقصد غریب کے بچے کو بہتر تعلیم دلانا ہے اور بہتر تعلیمی نظام کیلئے اسکولز سطح پر آئی بی اے طرز کی تعلیم کیلئے اقدامات کررہے ہیں، پہلے یونیورسٹیز میں لڑائیاں ہوا کرتی تھی، تاہم تعلیم کے ساتھ اگر بہتر ماحول ہو تو سونے پر سہاگہ ہے۔

خورشید شاہ کا کہنا تھا کہ آئی بی اے یونیورسٹی کا ماحول اور تعلیم دونوں بہترین ہیں، سری لنکا، ملائیشیاء افغانستان سے بچے سکھر آئی بی اے تعلیم کیلئے آرہے ہیں۔

ان کا کہنا تھا کہ سندھ حکومت اور ہائیر ایجوکیشن تعلیمی اصلاحات کیلئے بہت مدد کررہی ہے اور تعلیم کی بہتری کیلئے سب کو کام کرنا ہوگا۔

قبل ازیں وائس چانسلر رجسٹرار و دیگر انتظامیہ نے آئی بی اے میں زیر تعمیر منصوبوں پر بریفنگ دی۔