ٹوکیو پیرا لمپکس میں حیدر علی نے پاکستان کے لیے گولڈ میڈل جیت لیا

ٹوکیو میں جاری پیرا لمپکس میں پاکستان نے تاریخ میں پہلی مرتبہ گولڈ میڈل حاصل کرلیا ہے۔ ڈسکس تھرو کے مقابلوں میں پاکستان کے حیدرعلی نے 55.26 میٹر تک تھرو کرکے پاکستان کو کامیابی دلوائی۔

جاپان کے شہر ٹوکیو میں کھیلوں کے عالمی میلے اولمپکس کے بعد پیرا لمپکس کے مقابلے جاری ہیں جس میں دنیا بھر سے مرد اور خواتین کھلاڑی حصہ لے رہے ہیں۔

پیرالمپکس میں ڈسکس تھرو کے مقابلوں میں پاکستان کے حیدر علی نے تیسرے راؤنڈ میں 47.84 میٹر کی تھرو کی جبکہ پانچویں راؤنڈ میں انہوں نے 55.26 میٹر کی تھرو کرکے گولڈ میڈل اپنے نام کیا۔

It’s #Gold for #PAK! F37 discus thrower Haider Ali wins his country’s first medal of the Games!

His throw of 55.26m is a personal best and almost three metres longer than second place! #Tokyo2020 #Paralympics #ParaAthletics pic.twitter.com/SD3rO1qlaF

— Paralympic Games (@Paralympics) September 3, 2021

یہ بھی پڑھیے

جیولن تھرو ایتھلیٹ ارشد ندیم نے اپنے سپورٹر کا نام ظاہر کردیا

حیدرعلی پیرا لمپکس میں گولڈ میڈل جیتے والے پہلے پاکستانی بن گئے ہیں۔ اس سے قبل حیدر علی پیرالمپکس میں چاندی اور کانسی کے تمغے جیت چکے ہیں۔

گوجرانوالہ سے تعلق رکھنے والے حیدر علی پیدائشی طور پر دائیں ٹانگ سے معذور ہیں۔ اپنی کامیابی پر حیدر علی نے کہا کہ وہ کبھی بھی اپنی معذوری سے مایوس نہیں ہوئے، انہیں دنیا میں پاکستان کا نام روشن کرنے پر فخر ہے۔

واضح رہے کہ حیدر علی ملائیشیا، بیجنگ، انڈونیشیا سمیت دیگر ممالک میں بھی پاکستان کی نمائندگی کر چکے ہیں جہاں انہوں نے کئی اعزاز اپنے نام کیے۔ پیرا لمپکس میں پاکستان کے لیے گولڈ میڈل جیتنے پر انہیں خوب سراہا جارہا ہے۔